ឯកឧត្តម សាយ សំអាល់៖ ការអភិវឌ្ឍសេដ្ឋកិច្ច សង្គម មានឥទ្ធិពលទៅលើកិច្ចគាំពារ បរិស្ថាន ការគ្រប់គ្រងធនធានធម្មជាតិ និងការអភិរក្សជីវៈចម្រុះនៅកម្ពុជា
04-November-2019 | ដោយ ពលមនសិការ
ភ្នំពេញ៖ នៅក្នុងពិធីបើក«សន្និបាតបូកសរុបលទ្ធផលការងារបរិស្ថានឆ្នាំ២០១៩ និងលើកទិសដៅការងារឆ្នាំ២០២០» របស់ក្រសួងបរិស្ថាន រៀបចំឡើងនៅរាជធានីភ្នំពេញ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានលើកឡើង បានលើកឡើងបរិការណ៍សេដ្ឋកិច្ច សង្គម ដែលមានឥទ្ធិពលទៅលើកិច្ចគាំពារបរិស្ថាន ការគ្រប់គ្រងធនធានធម្មជាតិ និងការអភិរក្សជីវៈចម្រុះនៅកម្ពុជា។
ក្នុងឱកាសនោះ ឯកឧត្តម រដ្ឋមន្ត្រីបានសង្កត់ធ្ងន់ថាទី១-កិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព នឹងមិនអាចទទួលបានជោគជ័យឡើយ ប្រសិនបើពុំមានសុខសន្តិភាព ស្ថិរភាពនយោបាយ និងកំណើនសេដ្ឋកិច្ចរឹងមាំ។ ដូច្នេះ អាទិភាពសម្រាប់យើង គឺត្រូវធ្វើយ៉ាងណាបន្តរក្សាឱ្យបាននូវសុខសន្តិភាពពេញលេញ ស្ថិរភាពនយោបាយ និងអធិបតេយ្យជាតិ ព្រមទាំងការពង្រឹងនីតិរដ្ឋ លទ្ធិប្រជាធិបតេយ្យពិតប្រាកដ និងកំណើនសេដ្ឋកិច្ចខ្ពស់ ជាមធ្យមក្នុងរង្វង់៧% ទើបយើងអាចបន្តជំរុញការអភិវឌ្ឍសេដ្ឋកិច្ចសង្គម កាត់បន្ថយភាពក្រីក្រ បង្កើតការងារ និងលើកកម្ពស់ជីវភាពរស់នៅរបស់ប្រជាជនបន្ថែមទៀត និងធានាមិនឱ្យភាពក្រីក្រត្រឡប់មកវិញបាន។ ខ្ញុំមានជំនឿយ៉ាងមុតមាំថា គោលដៅទាំងនេះនឹងអាចសម្រេចបានយ៉ាងប្រត្យក្ស អាស្រ័យដោយយើងមានមាគ៌ានយោបាយដ៏ត្រឹមត្រូវរបស់រាជរដ្ឋាភិបាល ក្រោមការដឹកនាំរបស់គណបក្សប្រជាជនកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ជាអគ្គមគ្គុទេសក៍ដ៏ឆ្នើម ប្រកបដោយគតិបណ្ឌិត។
ជាក់ស្តែង ក្នុងអាណត្តិនេះ រាជរដ្ឋាភិបាលបានដាក់ចេញ«យុទ្ធសាស្ត្រចតុកោណដំណាក់កាលទី៤» ដែលឈរលើសមិទ្ធិផលនៃយុទ្ធសាស្ត្រចតុកោណដ៏ជោគជ័យទាំង ៣ដំណាក់កាលកន្លងមក ក៏ដូចជាគោលនយោបាយនានា ជាពិសេស គោលនយោបាយ ឈ្នះ-ឈ្នះ និងផែនការយុទ្ធសាស្ត្រអភិវឌ្ឍន៍ជាតិ ជាបន្តបន្ទាប់ ដែលជាការបុកគ្រឹះសម្រាប់ទ្រទ្រង់កំណើនសេដ្ឋកិច្ចដ៏រឹងមាំ និងការអភិវឌ្ឍលើគ្រប់វិស័យដូចសព្វថ្ងៃនេះ។
ពិសេសជាងនេះទៀត ឯកឧត្តម រដ្ឋមន្ត្រី បានចាត់ទុកថា យុទ្ធសាស្ត្រចតុកោណដំណាក់កាលទី៤នេះ បានគូសបញ្ជាក់យ៉ាងច្បាស់អំពីការយកចិត្តទុកដាក់ខ្ពស់របស់រាជរដ្ឋាភិបាល ចំពោះការអភិវឌ្ឍប្រកបដោយចីរភាពនិងបរិយាបន្ន ព្រមទាំងការធានាចីរភាពបរិស្ថាន និងការរៀបចំខ្លួនឆ្លើយតបនឹងការប្រែប្រួលអាកាសធាតុ។
ទី២-ការងារបរិស្ថានអាចសម្រេចជោគជ័យទៅបាន លុះត្រាតែមានកិច្ចសហប្រតិបត្តិការល្អ និងការចូលរួមយ៉ាងសកម្មពីអ្នកពាក់ព័ន្ធទាំងអស់ ទាំងក្នុងវិស័យសាធារណៈ វិស័យឯកជន គ្រឹះស្ថានសិក្សាស្រាវជ្រាវ និងសង្គមស៊ីវិល ទាំងកម្រិតជាតិ និងអន្តរជាតិ។ នៅត្រង់ ចំណុចនេះ ឯកឧត្តមរដ្ឋមន្ត្រី បានគូសបញ្ជាក់ថា ទោះបីក្រសួងបរិស្ថាន និងក្រុមប្រឹក្សាជាតិអភិវឌ្ឍន៍ដោយចីរភាព ត្រូវការការគាំទ្របច្ចេកទេស និងហិរញ្ញវត្ថុពីដៃគូអភិវឌ្ឍន៍ ដើម្បីរួមចំណែកដោះស្រាយបញ្ហាប្រឈមក៏ដោយ ក៏យើងបានប្រកាន់ខ្ជាប់នូវគោលការណ៍ «ភាពជាម្ចាស់» និង«អធិបតេយ្យភាពជាតិ» ដើម្បីធានាឱ្យកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព ប្រព្រឹត្តទៅប្រកបដោយប្រសិទ្ធភាព និងស្ថិតក្នុងឧត្តមប្រយោជន៍របស់ជាតិនិងប្រជាជនកម្ពុជាជានិច្ច។
ទី៣-ភាពជោគជ័យនៃកិច្ចខិតខំប្រឹងប្រែងក្នុងកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព គឺអាស្រ័យជាចាំបាច់លើកត្តាធនធានមនុស្ស ហិរញ្ញវត្ថុ បច្ចេកវិទ្យា និងវិទ្យាសាស្ត្រ ដែលទាមទារឱ្យមានការចូលរួមគាំទ្រ និងវិនិយោគឱ្យកាន់តែខ្លាំងក្លាបន្ថែមទៀត។ ពាក់ព័ន្ធនឹងចំណុចទី៣នេះ ឯកឧត្តម សាយ សំអាល់ បានអំពាវនាវដល់ក្រសួង ស្ថាប័នពាក់ព័ន្ធ ព្រមទាំងវិស័យឯកជន និងដៃគូអភិវឌ្ឍន៍ទាំងអស់ សូមមេត្តាបន្តការចូលរួមនិងគាំទ្រដល់ក្រសួងបរិស្ថានបន្ថែមទៀត ដើម្បីយើងមានលទ្ធភាពគ្រប់គ្រាន់ ទាំងធនធានមនុស្ស ហិរញ្ញវត្ថុ បច្ចេកវិទ្យាវិទ្យាសាស្ត្រ និងមធ្យោបាយ សម្ភារ សម្រាប់ការបំពេញបេសកកម្មក្នុងវិស័យនេះ ឱ្យបានកាន់តែប្រសើរឡើងថែមទៀត ៕
ចំនួនអ្នកទស្សនា
- ថ្ងៃនេះ7401
- ម្សិលមិញ20231
- សប្តាហ៍នេះ86481
- ខែនេះ108361
- ឆ្នាំនេះ108361
- សរុប20550817